Long-life Paryer Offering to HH the 14th Dalai Lama by People of Zachukh...

རྫ་ཆུ་ཁ་བའི་བརྟན་བཞུགས་མཎྜལ་བཤད་པ།

༄༅། །ཨོཾ་བདེ་ལེགས་སུ་གྱུར་ཅིག
བཀྲ་ཤིས་དྲི་བྲལ་ལྷ་དར་དཀར་པོ་ཕྱོགས་མཚམས་ཀུན་ཏུ་མངོན་གཡོ་ཞིང་།།བཀྲ་ཤིས་ཕན་བདེའི་འབྱུང་གནས་དམ་པ་ཕྱོགས་བཅུའི་རྒྱལ་ཀུན་འདུས་པའི་དྲུང་།།བཀྲ་ཤིས་ཚིག་གིས་མངོན་པར་བསྟོད་ཅིང་དྭངས་པའི་ཡིད་ཀྱིས་གསོལ་འདེབས་ན།།བཀྲ་ཤིས་ས་གསུམ་ཀུན་ཏུ་དགེ་བའི་ལེགས་ཚོགས་མ་ལུས་སྩལ་དུ་གསོལ།། ཞེས་དྲང་སྲོང་བདེན་པའི་དབྱངས་ཀྱི་མེ་ཏོག་མན་ད་ར་བ་མངོན་པར་འཐོར་ནས་བཀྲ་ཤིས་པའི་ཚིག་གིས་སྒོ་འཕར་ཡངས་པོར་ཕྱེས་ཏེ། ལྷ་དང་བཅས་པའི་འགྲོ་བ་ཡོངས་ཀྱི་མ་འདྲིས་པའི་མཛའ་བཤེས། རང་ཅག་ཁ་བ་རི་བ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ། འཇིག་རྟེན་ཞི་བདེའི་དེད་དཔོན་ཆེན་པོ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག༸གོང་ས༸སྐྱབས་མགོན་རྒྱལ་བའི་དབང་པོ་ཐམས་ཅད་མཁྱེན་ཅིང་གཟིགས་པ་ཆེན་པོ་དགོས་པ་དང་དོན་གྱི་སླད་དུ་མཚན་དངོས་སུ་སྨོས་ན༸རྗེ་བཙུན་འཇམ་དཔལ་ངག་དབང༸བློ་བཟང་ཡེ་ཤེས༸བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་གི་ཞབས་པད་མི་འཇིགས་གདོང་ལྔས་བཏེགས་པའི་གསེར་གྱི་ཁྲི་འཕང་མངོན་པར་མཐོ་བའི་གམ་དུ།
སྒོ་གསུམ་རབ་གུས་མདོ་ཁམས་རྫ་ཆུ་ཁ་བ་གཞིས་བྱེས་གཉིས་ཀྱི་ལྷ་དང་བཅས་པའི་སེར་

དངོས་ཤུགས་གང་རུང་ནས་བརྟན་བཞུགས་ཀྱི་ཆ་ཤས་བླངས་བའི་དགོན་པ་ཁག་གི་མཚན་ཐོ།

1.                 ༄།། ཨ་དྲེལ་དགོན་དགའ་ལྡན་བསམ་གཏན་ཐེག་ཆེན་ཆོས་འཁོར་གླིང་།

2.                 ༄།། ཨ་དྲེལ་བཙུན་དགོན་ཐུབ་བསྟན་ཆོས་གླིང་།

3.                 ༄།། ཤུལ་མ་དགོན་དགེ་ལྡན་ཕུན་ཚོགས་བཤད་སྒྲུབ་དར་རྒྱས་གླིང་། 

4.                 ༄།། མཁར་ནང་དགོན་དགའ་ལྡན་བཤད་སྒྲུབ་ཐུབ་བསྟན་འཕེལ་རྒྱས་གླིང་།

5.                 ༄།། བ་རོང་དགོན་དགའ་ལྡན་བསྟན་རྒྱས་གླིང་།

6.                 ༄།། ཀ་བཞི་དགོན་རྨད་བྱུང་དགའ་ལྡན་བྱུང་ཆུབ་ཆོས་འཕེལ་གླིང་།

7.                 ༄།། རྫ་རྒྱལ་དགོན་ཕུན་ཚོགས་ནོར་བུའི་གླིང་།

8.                 ༄།། བ་ཐུར་ལྕང་མ

སྤྱི་ལོ་༢༠༡༤ཟླ༡༢ཚེས༢༨ཉིན་༧གོང་ས་མཆོག་ལ་རྫ་ཆུ་ཁ་བའི་བརྟན་བཞུགས་འབུལ་སྐབས།

རྫ་ཆུ་ཁ་བའི་བརྟན་བཞུགས་འབུལ་སྐབས་ཀྱི་གཏན་ཚིགས་ཆེན་མོ།

༄༅། །ལྷར་བཅས་འགྲོ་བ་ཡོངས་ཀྱི་སྐྱབས་མགོན། རྣམ་འདྲེན་སྟོབས་བཅུ་མངའ་བའི་ཐུགས་སྲས། འཛམ་གླིང་ཞི་བདེའི་དེད་དཔོན་ཆེན་པོ། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག།གངས་ལྗོངས་སྐྱེ་འགྲོ་ཡོངས་ཀྱི་མེ་ཏོག་གང་ལ་ཕོག་པའི་ལྷ་སྐལ། སྡོམ་བརྩོན་ངུར་སྨྲིག་གར་གྱི་རྣམ་རོལ། རྒྱལ་མཆོག་ཕྱག་ན་པདྨོ་སྐུ་ཕྲེང་བཅུ་བཞི་བ་ཆེན་པོ་མཆོག འདིར་བཞུགས་སློབ་ཚོགས་འདུས་པ་རྒྱ་མཚོའི་དབུས་སུ། སྐུ་ལྷམ་མེ། གསུང་ལྷང་ངེ་། ཐུགས་ལྷན་ནེར་བཞུགས་པའི་གསེར་གྱི་ཁྲི་འཕངས་མངོན་པར་མཐོ་བའི་དྲུང་དུ།།

          གུས་འབངས་རྫ་ཆུ་ཁ་གཞིས་བྱེས་སེར་སྐྱ་མཆོག་དམན་ཡོངས་ནས་༧མགོན་པོ་གང་ལ་བཅོས་མིན་གྱི་དད་པ་དང་། གཡོ་བ་མེད་པའི་དམ་ཚིག རྨ་མེད་ཀྱི་ལྷག་བསམ་དག་པའི་ངང་ནས་སྒོ་གསུམ་གུས་ཕྱག་གྲངས་མེད་སྔོན་དུ་བཏང་སྟེ་གསོལ་བ་རྩེ་གཅིག་ཏུ་འདེབས་སྙིང་།

༼ཞུ་དོན་དང་པོ༽ རྫ་ཆུ་ཁ་སྤྱིའི་ངོ་སྤྲོད་སྙིང་བསྡུས།

          བོད་མདོ་ཁམས་འབྲི་རྫ་ཟལ་མོ་སྒང་གི་ཆར་གཏོགས། རྫ་ཆུ་དལ་འབབ་རིང་མོའི་རྒྱུད་དུ་གཞིས་ཆགས་པའི་རྒྱ་ཁྱོན་ཚོ་མ་ལག་བཞི་བཅུར་ཉེ་བ་ཅན་གྱི་བྱང་སྡེ་ཉི་མ་རྫ་ཆུ་ཁ་ནི་༧རྒྱལ་ཀུན་སྙིང་རྗེའི་རང་གཟུགས་འཕགས་མཆོག་སྤྱན་རས་གཟིགས་ཀྱིས་བདག་སོགས་ལྷ་དང་བཅས་པའི་ཁམས་གསུམ་འགྲོ་བ་སྤྱི་དང་། ཡང་སྒོས་བོད་ཡུལ་སཱ་ལའི་སྨན་ལྗོངས་འདི་བཞིན་གང་གི་གདུལ་ཞིང་དུ་བཞེས་པ་ནས་བཟུང་། བོད་ཀྱི་ཆོས་རྒྱལ་རིམ་བརྒྱུད་ནས་ཆབ་སྲིད་འཕེལ་གྲིབ་ཇི་ལྟར་ཡང་། དུས་ད་ལྟའི་བར་དུ་བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་དང་། དེའི་རྒྱུན་རྩོད་མེད་ད་ལྟའི་དབུས་བོད་མིའི་སྒྲིག་འཛུགས་དང་། རྒྱལ་མཆོག་སྐུ་ཕྲེང་རིམ་བྱོན་གྱི་ཐུགས་རྗེའི་གྲིབ་བསིལ་གྱིས་འཚོ་བཞིན་དད་དམ་གཡོ་བ་མེད་པའི་ངང་དུ་གནས་ཤིང་། འདས་མ་ད་གསུམ་ལ་བསིལ་ལྡན་གངས་རིའི་ལྗོངས་ཀྱི་ཆབ་འབངས་རྣལ་མ་ཞིག་གི་འདུ་ཤེས་སྐད་ཅིག་ཙམ་ཡང་དོར་མ་མྱོང་པའི་འབྲོག་སྡེ་ཞིག་ཡིན། ཡུལ་འདིར་ཆབ་འབངས་ཕལ་ཆེར་རྙིང་མ་དང་དགེ་ལྡན་གྱི་ཆོས་བརྒྱུད་འཛིན་པར་གཏོགས་ཤིང་། དཔལ་ས་སྐྱ་དང་བཀའ་བརྒྱུད་པའི་ཆོས་བརྒྱུད་ཀྱང་རེ་ཟུང་ཡོད། སྔོན་གྱི་དུས་སུ་གནས་འདིར་འཇིགས་མེད་རྒྱལ་བའི་མྱུ་གུ་དང་། སྤྱོད་འཇུག་བསྟན་པའི་བདག་པོ་རྫ་དཔལ་སྤྲུལ་འཇིགས་མེད་ཆོས་ཀྱི་དབང་པོ། འཇུ་མི་ཕམ་ཕྱོགས་ལས་རྣམ་རྒྱལ།