ཨ་མཆོད་འཇམ་དཔལ་ཚུལ་ཁྲིམས།
ཁ་བྱང་གི་འགྲེལ་བ།
གངས་རིའི་མགོན་པོ་ནི། ཇི་སྐད་དུ། “ཤར་རྡོ་རྗེ་གདན་གྱི་བྱང་ཕྱོགས་ན།། གནས་པུར་རྒྱལ་བོད་ཀྱི་རྒྱལ་ཁམས་ཡོད།། རི་མཐོན་པོ་གནམ་གྱི་ཀ་བ་ཡོད།། མཚོ་དམའ་མོ་གཡུ་ཡི་མཎྡྲལ་ཡོད།། གངས་དཀར་བོ་ཤེལ་གྱི་མཆོད་རྟེན་ཡོད།། སྤང་སེར་བོ་གསེར་གྱི་ས་གཞི་ཡོད།། དྲི་ཞིམ་པོ་སྨན་གྱི་བདུག་སྤོས་ཡོད།། སྟོན་བཀྲ་བ་གསེར་གྱི་མེ་ཏོག་ཡོད།། དབྱར་བཀྲ་བ་གཡུ་ཡི་མེ་ཏོག་ཡོད།། ཀྱེ་གངས་རིའི་མགོན་པོ་སྤྱན་རས་གཟིགས།། གནས་དེ་ན་ཁྱོད་ཀྱི་ཞིང་ཁམས་ཡོད།། ཞིང་དེ་ན་ཁྱོད་ཀྱི་གདུལ་བྱ་ཡོད།།”བཀའ་གདམས་གླེགས་བམ་ལས་དྲངས། ཞེས་ཇི་ལྟར་ལུང་དུ་བསྟན་པ་བཞིན་འཕགས་མཆོག་མིག་མི་ཟུམ་པ་ནི་གྲངས་མེད་བསྐལ་བ་མང་པོའི་སྔོན་ནས་ཞིང་འདི་དང་གནས་ཉིད་བདག་གིར་མཛད་པ་ཡིན་པས་ན་གངས་རིའི་མགོན་པོ་ཞེས་ལྷ་ཀླུ་མི་གསུམ་དང་སྲིད་པ་གསུམ་གྱི་ཡུལ་དུ་གྲགས་པ་ཡིན།
